السلام عليكم ورحمة الله وبركاته
كل عام وانتم طيبين وبخير وسعادة ورمضان كريم … رمضان السنة دي غير أي رمضان عدي علينا
رمضان مليئ بالرحمات واحنا دلوقتي في احوج وقت لرحمة ربنا بينا
اكيد فيه كتير مننا راجعوا نفسهم في افعالهم بسبب الازمة الحالية وحسوا قد ايه الانسان ضعيف وان قدرة ربنا بلا حدود
الازمة الحالية ساوت بين الغني والفقير…. القوي والضعيف لانهم بيواجهوا نفس الخطر الاتنين مش عارفين
يعيشوا
يسافرو
يشتغلو
خافين علي أولادهم ونفسهم
وكمان ربنا بعدنا عن المساجد وده موضوع مش سهل ابدا حتي علي اللي ما بيصليش او بيصلي متقطع
شايفك وانت بتهرش في راسك قد يكون ربنا بيرحم كل الناس بسبب رحمته لاقرب الناس ليه
ركز معايا بقة لو فعلا انت نفسك تتغير وعلي فكره الكلام ده لي قبل ما يكون ليكم
تخيل معايا ان رمضان ده اخر رمضان ليك ممكن تعمل فيه ايه ؟؟
فكر معايا كده وقف الفيديو وهات ورقة وقلم واقسم الورقة نصين
واكتب كل حاجه نفسك تعملها فيه
اكتب كل حاجة ندمت انك عملتها او لسة بتعملها ونفسك ما تعملهاش
تحب اساعدك ؟؟
كل حاجه نفسك تعملها في رمضان
صيام طبعا لو ما كنتش بتصووووم
مواظبة الصلاه
التراويح
قيام الليل
صدقة
زكاه
قراءة قران
حفظ قران
تعليم اولادك تعاليم الدين
تكلم قرايبك اللي بقالك سنين ما بتكلمهمش وتسلم عليهم
تصالح أي حد زعلان منك حتي لو هوه اللي غلطان
تراضي زوجتك واولادك
تعمل صدقة جارية او عمل ينتفع به
تسدد ديونك
طيب بالنسبة للي عملته وندمت عليه او عارف انه غلط
ظلم الناس
الغيبة والنميمة
الحسد
القسوة علي الزوجة والأولاد
التدخين
خلصت كتابة … شارك معايا اللي كتبته في صحفتي علي الفيسبوك او ايميلي وهيكون سري عشان اقدر اساعدك
ممكن تكون نفسك تعمل حاجات كتير لكن ما عندكش الوقت او انت شايف ان ماعندكش وقت او ما عندكش العزيمة انك تقدر تتغير
النهارده ان شاء الله هحاول اساعدك في الفيديو ده بس 10 نصائح تحطها في جدول وتنفذها كل يوم وهتكون علي قد وقتك وامكانياتك عشان تطلع من رمضان باذن الله واحد تاني هوه اللي انت بتتمناه لكن مش عارف تحققة من سنين و تنفع نفسك في الدنيا والاخرة
طيب ليه رمضان تحديدا ؟؟
رمضان شهر رحمة وبتقوي فيه عزيمتك بسبب بعدك عن شهوات كتير للصيام
فقدرتك علي التغيير بتكون اكبر بكتير
زائد ان عمل خطة مكثفة لمدة شهر دافع قوي لتحقق النجاح لانها خطة محددة بافعال محدده ووقت محدد
- اول نصيحة هي ان فرصتك في انك تتعرف علي اولادك وزوجتك … اه انت سمعتني كويس …انت مشغول دايما وعلي طول مش موجود معاهم … دلوقتي جت فرصة ممكن ما تتكررش كتير ومش باختيارك فياريت تستغلها صح وتستفيد منها
اقعد معاهم وافهم مشاكلهم وقرب منهم اكتر وطور من معرفتهم الدينية والدنيوية وقدراتهم وساعد زوجتك في تربيتهم وعلي فكرة دي مشكلة عندي انا شخصيا وفعلا بسبب الازمة دي عملت كده والنتائج رائعة.
اعمل غرفة او حتي ركن من البيت يكون مسجد وصلوا كل الصلوات مع بعض فيه وكمان صلاة التراويح وتخيل معايا
لو قريت بعد كل صلاه معاهم 5 صفحات من القران هتختم المصحف في اخر الشهر بكل سهولة ومش لوحدك لا انت واولادك ولو كمان تعرف تعلمهم احكام التجويد ولو كل يوم حكم واحد فقط هتفرق معاكو جدا
لنك لكورس مجاني لاحكام التجويد
طبعا لو هتصلي امام فانت هتقع في مطب حلو جدا وهوه انك مش حافظ كتير وهتكرر نفس الصور وهيبقي شكلك وحش قدام ولادك يبقي ممكن كمان نراجع علي اللي حفظناه ونسيناه ونحفظ الصور الكبيره زي ياسين والكهف ومريم والنحل
هتبقي كده حفظت وماريست في نفس الوقت يعني باقل مجهود ثبت حفظك
- بعد ما تكمل المقال روح راضي مراتك لو زعلانه … اعملها حاجه تفرحها وحاول تفهم انك في الحظر لسه عندك حاجات تشغلك زي شغلك وحاجات تانيه كتير لكن هي ما عندهاش أي وسيله ترفيه فخليك قريب منها ودايما حسسها انك مقدر تعبها ومجهودها معاك انت واولادك والكلام ده لي طبعا انا كمان
- بعد ما تكمل المقال ده اتصل بقرايبك فورا اللي بقالك فتره طويلة ما كلمتهمش واطمن عليهم وهنيهم برمضان . صدقني هتحس بسعاده وراحه لا توصف علي افتراض ان ده اخر رمضان ليك يبقي يمكن ما تشوفهم تاني … اتصل باي واحد انت زعلان منه او كلمة واطمن عليه وصدقني انت الكسبان
- راجع زكاتك وطلعها عشان تكون فاتح صفحة جديدة مع ربنا وتدخل رمضان وانت ما عليكش أي التزام
طبعا لو عايز تعرف الزكاة كام بالتفصيل شوف الفيديو ده
طبعا اكيد انت عارف الفرق بين زكاة المال وزكاة الفطر
كيفيه احتساب زكاة الفطر
- الفرق بين زكاة المال وزكاة الفطر
https://www.youtube.com/watch?v=mSw4dZxFCGM
- بلاش تبدأ رمضان بحماس زايد وتزود في العبادة بشكل صعب تواظب عليه وتيجي في اهم أيام وهي اخر 10 أيام وتهبط وعزيمتك تقل ودي اهم أيام … خليك معتدل علي قد ما تقدر ونفذ اللي هنقول عليه وهوه كافي جدا.
- استبدل مسلسلك المفضل بكورس في مجال انت بتحبه ونفسك تتعلمه … لو انت بتقضي ساعتين او ثلاثة قدام التليفزيون خد منهم ساعة واحدة للكورس ده وفي اخر الشهر هتكون حضرت 30 ساعة اللي هي مدة اكبر من معظم الكورسات الموجودة في السوق لو محتاج كورس في أي مجال تواصل معي علي جروب وفر وقتك وهوفره ليك مجاني باذن الله بس ابعت علي الجروب ولنك الجروب في صندوق الوصف و لازم تعرف انك من اهم الحاجات اللي تبدأ بتطويرها هوه الإنجليزي لان ده مفتاح النجاح لكل طموح في أي مجال كان … احفظ كل يوم جمله فقط ورددها طول اليوم وتابع إبراهيم عادل زي اميركان انجلش ومارس يوميا هتلاقي نفسك في مستوي تاني خالص.
- خد بالك من موضوع الاكل جدا لان رمضان ده غير أي رمضان … انا بحب العب كورة جدا وامارس رياضة وطبعا مع الحظر كل ده توقف .. لو سيبت نفسك للأكل في رمضان هتطلع منه زايد 10 الي 15 كيلوا بعد ما تستفيد بالناصيح اللي قناها هتقعد سنتين تنزل في وزنك ده لو عرفت … ومش محتاج اقولك أيه اضرار الوزن الوزن الزائد
- لو بتشتغل من البيت حاول تنظم وقتك يعني قبل الفطر حاول تعمل شغل خفيف مش محتاج مجهود ذهني كبير لان جسمك بيكون في اقل مستويات طاقته قبل الفطار.
- اعمل صدقة جارية علي قد امكانياتك… سواء علم او اسهم بناء مسجد و او كفالة يتيم وساعد علي قد ما تقدر لان الناس فعلا بحاجه لمساعده دلوقتي ولو فيه حد عليه ليك فلوس انتظر عليه شويه لحد ما الأوضاع تتحسن …. اعمل كورس مفيد مجاني
فكر بعد عمر طويل الناس هتقول عليك ايه … سيب ذكري حلوه ليك في دنيتك عشان تنفعك في اخرتك
لو انت عملت قناة علي اليوتيوب ونيتك بس عمل فلوس فانت خسرت كتير في حين انك لو استحضرت نيتك بانك بتعمل خاجه فيها منفعة للناس وجنب ده ممكن تربح فثوابك محفوظ مع العلم ان الاثنين نفس الحاجه بس الفرق كبير بسبب النية - كل حاجه انت عملتها وندمت عليها توب لربنا توبة نصوحة لو ما تعرفش تغيرها وكل يوم ضيف حاجه انت عايز تبعد عنا وتكون كاتبها في الجدول وتلتزم بيها.
لا تنسي الدعاء اثناء قيام الليل وعند الإفطار للعالم كله ان ربنا يخرجنا من الازمة دي علي خيرو يرحم موتانا ويشفي مرضانا وتبقي ذكره سيئة مش عايزين نفتكرها بعد رمضان
كل المصادر في صندوق الوصف تحت الفيديو
